وليت نخاف من روحي عليك
نخاف لانهار نمشي و نخليك
و انا لي منجمش نعدي نهار بلا بيك
انت الي فكيت بلاصتك فيا
وقتلي طاحت بيا مالقيتك كان انت حنيت عليا ، هزيت معايا
انت الي وقفتني على ساقيا
و ستانست بيك وليت نموت عنومة بين يديك
كان نلقى نعنقك توا و نغطس فيك
وليت نخاف من روحي عليك ..
وليت نخاف لا بعدي تتعب
وانت تعرف هكا عليا باش تصعب
خاتر كان جات بيديا
نفكك من روحك و مانخليكش نهار بعيدة عليا
انا ملول كنت واضح معاك
و عمري ما كذبت عليك
من اول نهار ريتك تخبيت فيك
قتلك احكيلي يا بنيا شبيك ؟ نشوف في برشا حزن في عينيك
خلينا هكا لا تتعلق بيا لا نتعلق بيك ..
مانيش ولد حرام مانحبش نكمل عليك
مانحبش نبنيلك فالجنة قصر و نبات ليالي نمني فيك
وانا عارف لي في شطر الثنية بش نسيبلك يديك
وليت نخاف من روحي عليك ..
خاتر لقيت روحي ضايعة
في ثنايا ما تعديش
في طقس ضباب ما يوريش
في حكاية موش مكتوبلها تعيش
اما نحبك تتأكد
عمرها مكانت حكاية متع صغر عمرها مكانت حكاية متع طيش
نحبك بعدي تعيش
نحب نراك عروسة ، تفرح و كي نجي على بالك تتفكرني بالبوسة المرصوصة
و كيما العادة
نحبك بروحك مغرومة ، و نهار و طولو اكا الضحكة على شفايفك مرسومة
و نحب كان نمشي توعدني
توعدني ماتبكيش
توعدني ماتخليش الحزن فيك يعيش
توعدني ترد بالك على روحك
و تتعداني
اما ما نحبكش تنساني
مانحبكش تنسا وصيتي
خاتر انا مانيش باش ننسى الزين الي فيك
مانيش باش ننسى لا كلامك لا لوغة عينيك
وسامحني كان حبيتك و انا عمري ما كنت ليك..
#ڨوستافو_ڨافيريا
Commentaires
Enregistrer un commentaire